Am 15. Mai am morgä früeh 10 Mopedfahrer nämed sich die Müeh acht Tag z’verreisä zu ihrem Wohl sie fahred nach Kaltern is Südtirol.
Dä Ger isch vo Aafang a dä Spitzä gsi Z’ Wattwil hämer g’haltä für Cafi und Gipfeli, witer goht’s über Chur, Julier und dä Ofäpass, so richtig gäch id Kurve fahrä, das macht Spass.
In Lana, äs Städtli grad nach Meran, do simmer rächts weg vo dä Autobahn, s’Gampejoch uf und änne wieder abä und s’glich au bim Mendola mir händ alli üsi Freund dra gha z’fahrä über Berg und Tal und z’düsä um die vielä Bögä äs Bier im Torgglhof händ trotzdem alli mögä.
Im Turm do fülled mir eus dä Magä Für dä Schlummi goht’s is Cafi Mondschii abä, isch s’Büchli denn g’füllt bis obe usä gönd au mir scho bald go pfusä.
Am Sunntig denn zum Morgäässä Sind denn alli wieder z’ämä g’sässä Die einä häts g’juckd i dä Zechäspitzä Die händ den unbedingt uf’s Töffli müessä sitzä. Dä Räscht het lieäber dä Töff GP Im Fernseh wellä gseh.
Am Mäntig denn wo z’Sunnä, eus hät entgägä g’lacht, händ sich alli zämä au uf z’Sockä gmacht, bi üserm Usflug tüef i Dolomitä sinmer düset zügig, dochs ganzä ohni stressä und in Agordo denn go z’Mittag ässä.
Am Ziistig denn dä härti Chärn, hätti wellä fahrä gern, über d’Paso di Croce Dominii, dä isch denn allerdings g’schlossä gsi, so händs denn no en Umwäg g’macht, und sind ä chli spöter cho zum z’Nacht.
Am Mittwuch sind a paar ganz fuuhl, ä chli go liegä um dä Pool, a paari sind ganz g’müetlich und ohni Qual, go Töffli fahrä is Ultental.
Hüt Obig sind mir den alli zum Ässä, i dä Pansion Torgglhof ä chli z’ämä g’sässa, äs BBQ mit vielä geutä Sachä und ämä feinä Tröpfli Wii zum Schluss denn no än Dessert das hät no müessä sii.
Am Dunschtig, ihr chönds eu sicher denkä, jo genau, sind die meistä no über d’Paso di Giau, doch leider müend no villi Strossä, mägem langä Winter i dä Bergä, erst vom Dreck und Staub ämol no g’reinigt werdä.
Am Friitig sind ä paar, trotz Räggätropfä, no go um d’Eggä flitzä, andri händ lieber wellä im Gaartäbeizli sitzä, im Kaltererhof zum Obigässä, sind mir alli wieder g’müetlich zämä g’sässä.
Am Samstig morgä i dä früeh, wer sich do hät gnoh die müeh, ämol zum luegä zum ä Fenster usä, dem isches cho, s’wahrhafti grusä.
Grägnet häts vo Ziit zu Ziit, trotzdem hämer d’Wanderschueh montiert, sind über Stock und Stei zum Strobelhof marschiert, wo dä Wirt än feinä Kaiserschmarrn serviert.
Hei goht di Ziit doch schnell vorbie, scho isch es wieder Sunntig morgä gsi, zum Glück hät z’Sunnä wieder g’lacht, wo mir üs händ uf dä Heiweg g’macht.
Nach acht Tag, etlichä Kilometer und wieder Sunnäschii, sind mir am Sunntigobig wieder retour gsi. Das wärs gsi vo üsem Trip is Südtirol, ich sägä „Tschüss und läbäd wohl.“
Sprüchli von Jonny Bremsbelag	Bildli von Markus Rüeger